LA UNION – Napinget iti ar-aramiden a panagsanay ita ti Singapore team para iti umadanin a surfing competition iti sumaganad a lawas idiay San Juan, La Union.
Iti eksklusibo nga interview ti Bombo Radyo kenni Becky, maysa kadagiti surfer a mangubkbukel iti Singapore team, kinuna na a ‘challenging’ ken naidumduma iti waves iti nasao a lugar, isunga kasapolan a makabisado da iti garaw ti dalluyon para iti aramiden da a tricks ken mas napinpintas a performance.
Daytoy iti makagapo kunana nu apay a nasapa da a simmangpet ditoy probinsiya tapno adalen a naimbag iti garaw dagiti dalluyon iti baybay.
Aminado ni Becky nga awan ti dadackel a dalluyon iti pagilian da idiay Singapore isunga agtur-turong pay dagitoy iti sabali a pagilian, kas koma idiay Malaysia ken Indonesia tapno agsanay.
Ni Becky ket 5 tawenen nga agsu-surfing.
Kabayatanna, na-appreciate ni Becky iti presensiya dagiti police escorts ken rescue team a naka-deploy iti venue, tapno bantayan iti seguridad dagiti atleta ken delegado.
Awan met kunana ti problema da iti accomodation ken klase ti taraon iti nasao a lugar, nangruna ket adda metten iti gagayyem da a Pilipino.
Inton bigat, aldaw ti Biyernes, namnamaen nga agsangpet iti dadduma pay nga atleta manipud kadagiti pagilian a makipaset iti surfing tournament ti SEA Games 2019.
