Ilunglungalong da House Majority Leader Sandro Marcos ken House Speaker Bojie Dy ti House Bill No. 10431 wenno Sariling Kuryente Act, nga addaan panggep a mangpalaka iti pannakausar dagiti rooftop solar panels ken battery storage systems para iti bukod a panagkonsumo dagiti pagtaengan ken negosyo.
Iti sidong ti panukala, saanen a kasapulan ti certificate of compliance manipud iti Energy Regulatory Commission para kadagiti sistema a saan a mangipatulod ti kuryente iti distribution grid.
Maiparit met kadagiti distribution utility iti panangdawat ti kanayunan a permit, technical study, panagsukat ti metro wenno kanayunan a singir para kadagiti kwalipikado a non-exporting system.
Agtaltalinaed a sakop dagiti agdama nga interconnection rules dagiti sistema a mangipatulod iti sobra a kuryente iti grid.
Bilinen met ti gakat iti Department of Energy nga ikkaten dagiti lapped iti panagusar dagiti behind-the-meter systems ken mangpalawa iti access iti financing, dagiti kwalipikado nga installer ken mapagtalkan nga materyales.
No maipasa a linteg, masapul a mairuar dagiti implementing rules iti uneg ti 90 nga aldaw ken maipatungpal iti linteg kalpasan ti 15 nga aldaw manipud iti pannakapablaakna.###
