Dumurdur-as dagiti mannalon idiay Sitio Baratao, Barangay Acao, Bauang, La Union babaen ti agtultuloy a panang-papigsa ti pagbiagan kas iti panagmula ken panaglako ti nadumaduma a produkto agrikultura, kas iti sweet potato wenno kamote, tarong ken daddduma pay.
Daytoy laksid dagiti karit iti panagtalon, kas koma ti kinakurang ti danum, espasyo, adayo ken narigat a dalan, ngem agtaltalinaed a determinado dagiti mannalon a pagtalinaeden ti pagbiagan da.
Segun kenni Roldan Vergara, maysa mannalon ti nasao a lugar, adda iti direct buyers nga aggatang ti produkto-da, partikular dagiti aggapo idiay Urdaneta ken Baguio.
Inaklon na a saan nga isuda ti mangitudtuding ti presyo kadagiti ilaklako da nga apit a nateng, ngem ti napateg kunana ket magatang dagiti apit da a produkto.
Kinuna na a tunggal summer season wenno kalgaw, iti kamote wenno sweet potato ti kangrunaan nga imulmula-da, gaputa saan unay nga agkasapolan daytoy ti adu a danum kumpara iti dadduma a klase ti mula.
