Dinayaw ni House Assistant Majority Leader ken Lanao del Sur Rep. Zia Alonto Adiong ti panangipila ti kaso kriminal kadagiti uppat nga empleyado ti Davao City Civil Registrar’s Office a karaman ti panangipaay ti Philippine birth certificate kadagiti Chinese nationals a mabalin a paset laeng ti nalawlawa a modus isu a nasken a maitultuloy ti imbestigasyon.
Maus-usar dagiti peke a dokumento tapno maaddaan ti karbengan iti kina-Pilipino, makaala ti pasaporte a mangigubuay met kadagiti gangganaet a makastrek ti pagilian ken makatrabaho a legal.
Kinuna ni Adiong a ti eskandalo ket mangipakpakita ti tensyon ti baetan ti “Team Pilipinas ken Team China,” kasta met a mainayon pay dagiti Pilipino a pumabor kadagiti interes ti gangganaet kasukat ti national security ket rumbeng laeng a makasoan.
Nagpanawagan ti lider ti Kamara iti Department of Justice (DoJ), Philippine Statistics Authority (PSA), ken Department of Foreign Affairs (DFA) a mangisayangkat ti imbestigasyon kadagiti amin nga birth records a nairuar ti napalabas a sangapulo a tawen, nu sadino ket adda ti nangato a bilang dagiti migrante a Chinese.
Pinaregta na pay ti Bureau of Immigration (BI) nga adalaen dagiti alien employment permits ken investor visas kontra kadagiti panagpartuat ti peke a pakabigbigan.
