LA UNION – Maysa nga special child iti nakaiyawid ti pammadayaw para iti pagilian kalpasan a nangabak ti maysa a gold, dua a silver, ken maysa a bronze medal iti ay-ayam a power lifting iti naisayangkat nga Special Olympics idiay Abu Dhabi, United Arab Emirates.
Ni Joana Yabes, 37, residente ti Barangay Mameltac, San Fernando City, La Union ket maysa nga special child nga agad-adal iti North Central School ditoy syudad.
Kabilang iti sinalipan ken nangabakan ni Yabes ket iti 98, 99, at 115 kgs.
Iti eksklusibo a pannakiuman ti Bombo Radyo La Union kenni Yabes, pinagyamanan na dagiti simmuporta kenkuana, manipud iti pamilya na, trainors agingga kadagiti mangbukbukel iti organisasyon dagitoy tapno maipakita iti kabaelan da iti tay-ak ti sports.
Kinuna ni Yabes a daytoy iti umuna a gundway a nakipaset iti kompetisyon iti sabali a pagilian.
Ngem siguden a makipas-paset ken nangabak metten iti Special Olympics a naisayangkat idiay Manila ken Cebu.
