LA UNION – Nangbukelen iti special investigation task group ti La Union Police Provincial Office tapno mangidaulo iti imbestigasyon ti napasamak a panangpapatay kenni sigud a Sto. Tomas, La Union Vice-mayor Vincent Rafanan ken iti maysa a drug surrenderer idiay ili ti Pugo ti probinsia.
Nammuan ti Bombo Radyo kenni S/Ins. Julius Basalio, hepe ti Pugo Police Station, panggep ti task group a duktalen iti pudno a makagapu iti krimen ken iti pakabigbigan dagiti suspek.
Karaman kadagiti kitkitaen nga anggulo iti kaso ket ti maipagarup a pannakairaman ni Rafanan iti droga, politika ken iti personalna a biag.
Immuna iti daytoy, nakalugan iti maysa a kotse ti dating bise-alkalde ken ti nasao a drug surrenderer a ni Breatriz Sacamoto ti Basista, Pangasinan iti a napasamak ti panangtambang idiay ili ti Pugo.
Ni Rafanan ket maipagarup a karaman iti druglist kas high value target dagiti otoridad.(AbsFlores)
