LA UNION – Nangisayangkat ti ocular inspection dagiti kameng ti Sangguniang Panlalawigan Committee on Public Works and Utilities nga indaulwan ni Board Member Maria Annabelle De Guzman, iti national highway partikular iti segundo distrito ti La Union.
Iti eksklusibo a pannakiuman ti Bombo Radyo La Union kenni Board Member De Guzman, kinuna na nga adu pay dagiti nakita da a problema iti kalsada, nu maipapan iti pannakaipatungpal ti anti road obstruction ordinance ti probinsiya.
Impaganetget na a kasapolan a mawaknitan dagiti igid ti kalsada manipud kadagiti illegal structures ken illegal parking dagiti behikulo.
Nasken met nga ipatungpal dagiti contractors iti road safety and warning devices ti amin a proyekto ditoy probinsiya ken maisimpa wenno maikkat nu kasapolan dagiti poste ti koryente iti LUELCO ken LUECO agraman dagiti agsisimparat a kable ti telepono.
Amin dagitoy kunana ket ipapaayan da ti aksiyon babaen iti pannakitinnulong dagiti maseknan nga ahensiya ti gobyerno.
Uray dagiti concerned private companies nga akinkukua kadagiti linya ken poste ti kuryente ken telepono ket napatulodan metten ti surat, tapno urnosen iti utilities dagitoy.
Segun iti opisyal, rinugyanen ti LUECO nga ikkaten dagiti da-an a poste da kadagiti kalsada bayat nga iti LUELCO ket dimmawat ti panawen agingga July 2021.
Dagiti telephone company kas ti PLDT ket nagkari nga agtungpal da iti direktiba agingga agtapos ti agdama a tawen.
Nairanta ti nasao nga addang tapno masiguro iti kinatalged dagiti agdalyasat a motorista.
Malaksid dayta, compliance pay daytoy iti DILG Memorandum Circular No. 2019-121 wenno road clearing operation.
Kinuna pay ni SPM De Guzman a paset iti nasao a paglintegan iti pannakasurot iti 20 meters road right of way kadagiti national road, 15 meters road right of way iti provincial road, ken 10 meters iti municipal road.
Dagiti aglabsing iti nasao a paglintegan ket mamulta ti P2,000 para iti 1st offense; P3,000 2nd offense; ken P5,000 or imprisonment iti 3rd ken succeeding offense.
