Inallukoy ti Social Security System (SSS) dagiti household employers nga irehistro dagiti kasambahay tapno masigurado a karamanda iti social protection ti gobyerno.
Segun kenni SSS President ken CEO Robert Joseph de Claro, panggep ti Kasambahay Caravan a naisayangkat idi Marso 22 kadagiti 43 sites idiay Metro Manila ken Rizal a maiyasideg dagiti SSS services kadagiti household workers ken kadagiti employers.
Innayon na pay, dagiti rehistrado a kasambahay ket mabalin nga ag-apply para kadagiti SSS loan programs, karaman ti salary ken calamity loan, ken makaala met ti proteksion manipud ti Employees’ Compensation Program para ti work-related sickness, disability, wenno death.
Segun kenni SSS NCR Operations Group Acting SVP Benjamin Dolindo Jr., panggep pay ti caravan a papigsaen ti social coverage para iti sektor ti domestic help.
Maibasar ti Republic Act 11199 wenno Social Security Act of 2018, obligado dagiti employer nga irehistro dagiti kasambayda iti uneg ti 30 nga aldaw manipud idi maawat daytoy iti trabaho ken agremit ti kontribusyon.
Para kadagiti kasambahay nga agsasahod ti ₱5,000 wenno nasursurok pay, ikissay ti employer iti employee share iti sweldo, mainayon ti employer share, ken mabayadan kadagiti accredited channels. Para kadagiti agsasahod ti ₱5,000 wenno nababbaba pay, sakop ti employer iti pakabuklan a kontribusyon.
Impaganetget ni Social Security Commissioner Eva Arcos a rumbeng a kitaen iti social security kas long-term investment iti pagsayaatan dagiti mangmangged.###
