Nakasagana itan ti nakatuding nga State Visit ni Presidente Ferdinand Marcos Jr. idiay India manipud Agosto 4 agingga 8, 2025 kas sungbat iti imbitasyon ni Indian Prime Minister Narenda Modi.
Segun kenni Foreign Affairs Assistant Secretary Evangeline Ong Jimenez -Ducrocq, panggep ti panagbisita ti panangpapigsa ti relasyon ti Pilipinas ken India, kasta met nga usaren iti oportunidad tapno makalukat kadagiti kooperasyon ti nagduduma a tay-ak kas iti seguridad, ekonomiya, science and technology, ken people-to-people cooperation.
Karaman kadagiti nakalinya nga aktibidad ti presidente ket ti pannakilangen-langen na iti Filipino Community inton Agosto 4 wenno mismo nga aldaw iti panagsangpet na.
Maaddaan pay ti pannakitaripnong idiay New Delhi kenni Indian President Droupadi Murmu kasta met iti bilateral meeting kenni Indian Prime Minister Narendra Modi, kadwa ti Presidente iti Bharatia Janata Party, ken chair Minister of Health and Federal welfare a ni Janat Prakash Nadda. Nakalinya pay dagiti dua a business events a pannakitaripnong met kadagiti Indian CEOs ken sumagmamano a kumpaniya.
Makadwa met ti Presidente ti Philippine delagation a buklen da Foreign Affairs Secretary Maria Teresa Lazaro, National Defense Secretary Gilbert Teodoro Jr., Trade and Industry Secretary Christina Roque, ken Presidential Adviser for Investment and Economic Affairs Frederick Go.
Panggep ti Pilipinas a papigsaen ti maritime cooperation idiay India a karaman kadagiti innem a katulagan a nakatuding a mapermaan nga adda pakainaigan na iti law, culture, science and technology, ken dadduma pay.
