LA UNION – Manarimaan itan ti rollout para iti Step 2 iti National ID Registration ditoy probinsiya ti La Union.
Iti tunggal LGU ket naipaayan ti registration kits nga usaren kadagiti naituding a registration centers para iti panagala ti Biometric Information kadagiti registrants.
Iti Step 2 iti National ID Registration ket panangipaay ti Biometric Information dagiti registrants, ngem nasken a dimmalan nga immuna iti Step 1 a panangipaay ti Demographic Information.
Mainaig ti dayta, nangaramid dagiti LGU ti schedule iti tunggal barangay tapno mas naur-urnos ti agbalin a sistema iti panagparehistro.
Inlawlawag iti Philippine Statistics Authority (PSA) Region 1 babaen iti pannakiuman ti Bombo Radyo La Union kenni Atty. Sheila De Guzman, OIC Regional Director iti PSA Region 1, a target da a mairehistro nga umuna dagiti indibidwal a nagtaud iti nakukurapay a pamilya ngem mabalin latta a makapagparehistro dagiti tarigagay na a maaddaan iti National ID kas walk-in applicants wenno babaen iti pannaki-koordinar iti Civil Registrar iti bukod dagitoy nga ili wenno barangay.
