BR LA UNION – Kinedngan ti International Criminal Court (ICC) a guilty ni Ali Muhammad Ali Abd-Al-Rahman, wenno mas nalat-latak nga Ali Kushayb, iti 27 a kaso ti war crimes ken crimes against humanity seknan iti nalawa a kinadamsak idiay Darfur, Sudan manipud Agosto 2003 agingga Abril 2004.
Ni Kushayb ket sigud a nangato nga opisyal ti Janjaweed, maysa nga armado a grupo a sup-suportaran ti gobyerno ti Sudan a nalatak a karaman iti brutal a kampanya kontra kadagiti rebelde a grupo idiay Darfur.
Iti giyera ket nangrugi idi 2003 idi nag-rebelde ti grupo nga etniko nga African kontra Arab-dominated a gobyerno idiay Khartoum.
Kas sungbat, inyuswat ti gobyerno iti maysa nga scorched-earth campaign a pakaibilangan ti aerial bombings ken panagraut ti Janjaweed iti komunidad.
Segun iti ICC, ni Kushayb ket saan laeng a nagmandar iti panagraut, ngem personal pay a nakipaset iti pammapatay, panagrames, ken torture.
Maysa kadagiti testigo ti nagkuna nga immandar ni Kushayb kadagiti tao na nga “uliten ti panagraut” tapno masiguro nga awan ti makalasat.
Kabilang dagiti krimen a naidatag ket murder, rape, torture, persecution, ken forcible transfer of population.
Maysa daytoy kadagiti umuna a verdict ti ICC seknan iti Darfur conflict ken umuna a conviction para iti gender-based persecution iti pakasaritaan ti korte.
Pinagkedkedan ti ICC iti depensa ni Kushayb a “mistaken identity” ken nabigbig isuna nga aktwal a ni Ali Kushayb.
Iti pangngeddeng ket naipaulog iti panawen a kumarkaru manen ti kinadamsak idiay Sudan, partikular idiay Darfur, gaputi rinnupak ti Sudanese Army ken Rapid Support Forces (RSF), maysa a grupo a naggapo met laeng iti Janjaweed.
