LA UNION – Dead on arrival iti Ilocos Sur District Hospital idiay ili ti Tagudin, Ilocos Sur ni Sudipen, La Union Municipal Mayor Alexander Buquing, a nakairamanan iti police escort na a ni PO2 Rolando Juanbe, residente ti Barangay New Poblacion, Burgos, La Union.
Iti insayangkat nga inisyal nga imbestigasyon dagiti otoridad, dumaldalyasat iti lugan dagiti biktima iti kawatiwatan ti Bangar Castro Provincial Road, a minaneho ni Boni Depdepen idi kellaat a pinaputukan dagiti saan pay a nabigbig a suspek, a nakalugan iti puraw a pick up nga awanan ti plate number, ken naggapo iti likod.
Kas resulta, da Mayor Buquing ken Juanbe, 42, addaan asawa, ket nagsagaba iti multiple gunshot wounds iti naduma-duma a paset ti bagi ken ulo a puon ti dagus a nakatayan dagitoy.
Kabayatanna, naiturong met idiay Lorma Medical Center ditoy siyudad ti San Fernando ni Vice Mayor Wendy Joy Buquing ken ni Depdepen ngem indeklara ti attending physician a dead on arrival iti driver.
Iti agdama, agtultuloy iti hot pursuit operation ti pulisya kadagiti saan pay a nabigbig a suspek ken imbestigasyon nu anya ti motibo iti krimen.
