Pinabettak ti suicide bomber ti explosive vest na kabayatan iti maang-angay a kasar idiay Northwest Pakistan a nagresulta ti pannakatay dagiti pito a tattao ken nakadunoran dagiti 25 a sabali pay.
Ti suicide bombing ket napasamak iti balay ti pro-government community leader a ni Noor Alam Mehsud sadiay Dera Ismail Khan, maysa a distrito idiay Khyber Pakhtunkhwa province.
Segun iti local police chief a ni Adnan Khan, naiturongen dagiti natnatay ken nadundunor iti balay-pagagasan, nu sadino ket adu kadagitoy ti adda iti kritikal a kondisyon.
Maibasar kadagiti nakakita iti pasamak, adda dagitoy iti kangitingitan iti ragsak ken panagsasala iti mapasamak ti insidente.
Iti agdama ket awan pay met ti grupo nga umak-aklon iti terorismo, ngem mapapati nga aramid daitoy iti Pakistani Taliban a pagaammo kas Tehrik-e-Taliban Pakistan (TTP).
Nangiyuswat metten ti nasao a grupo ti nagduduma a klase ti panagraut kadagiti napalabas a tawen.
Pummigsa manen ti presensiya iti grupo kalpasan a makasubli iti bileg ti Afghan Taliban idi tawen 2021 kalpasan nga i-atras ti Estados Unidos ken North Atlantic Treaty Organization (NATO) dagiti tropa da idiay Afghanistan kalpasan ti dua a dekada a gyera.
