LA UNION – Nangipeksa iti nakaro a pannakadismaya dagiti sumagmamano a hog raisers nga apektado ti African Swine Fever (ASF) gapu iti maipagarup a nagbibingayan ti tallo a barangay officials ti tulong nga impaay ti gobyerno idiay Barangay Maragayap, ili ti Bacnotan, La Union.
Agpapada a nakuna dagiti nasao nga hog raisers ang isuda Ruth Cardinez, Randy Bucasas ken Reymart Turalba a maipagarup a nagnumaran dagiti tallo nga opisyal ti barangay dagiti buryas a para koma kadagitoy nga apektado ti ASF.
Agsidsiddawda no apay a dagiti saan met nga apektado ken saan a maiparbeng nga umawat iti tulong ket isu ti nakaawat kadagiti buryas ken feeds a kasukat kadagiti immuna a baboyda a naipasidong ti culling operation kabayatan ti kangitingitan iti panagsaira ti nadakamat a sagubanit ti dengguen.
Maipagarup a saan met a mailawlawag kadakauda ti kapitan iti barangay no apay a naipaayan ti ayuda dagiti tallo nga opisyal ti barangay.
Umaap-apela met dagiti apketado a hog raiser a tamingen koma daytoy iti municipal agriculture office gapu ta isuda ti lehimo a benepisyaryo ti gobyerno.
Kabayatanna, sigun met kenni Kagawad Juvinal Bucasas, nga uray isuna ket nakillaat gapu ta saan a naipakaammo a dagus nga adda dagiti simmangpet a tulong a para koma kadagiti hog raisers iti lugarda nga apektado ti ASF.
Para kenkuana, no man pay adda iti alegasyon dagiti kalugaranna kontra kadagiti tallo a padana nga opisyal ti barangay a maipagarup nga immawat iti buryas ket mas nasaysayaat laengen a pagbibingan dagitoy a tulong lalo kadagiti apektado nga agtartaraken iti baboy.
