Inyanunsyo ti Malakanyang na suspendido ti klase kadagiti amin a lebel kasta met iti trabaho iti gobierno ita nga aldaw Hulyo 23, 2025, kadagiti kadagt sumagmamano a lugar ditoy Pilipinas gapo iti agraraira a Southwest Monsoon wenno Habagat, kas maibasar metten iti rekomendasyon ti National Disaster Risk Reduction and Management Council (NDRRMC).
Karaman kadagitoy a lugar ket ti Metro Manila, Pangasinan, Zambales, Tarlac, Bataan, Pampanga, Bulacan, Cavite, Batangas, Rizal, Occidental Mindoro, Ilocos Norte, Ilocos Sur, La Union, Quezon, Oriental Mindoro, Marinduque, Romblon, Masbate, Sorsogon, Albay, Camarines Sur, Catanduanes, Palawan, Antique, Aklan, Capiz, Iloilo, Guimaras, Abra, Mountain Province, Ifugao, Benguet, Nueva Vizcaya, Nueva Ecija, Laguna, ken Negros Occidental.
Nupay kasta, maibasar iti Memorandum Circular No. 90, dagiti ahensya nga adda pakainaigan na kadagiti pampubliko a salun-at, seguridad, ken disaster response ket agtalinaed a silulukat ken operational tapno masiguro nga agtultuloy ti pannakaipaay kadagiti kangrunaan a serbisyo publiko.
Segun iti Palasyo, dagiti empleyado ti gobierno a saan a karaman kadagiti vital services ket mabalin latta nga agtrabaho babaen ti alternate work arrangements a maiyannurot iti agraraira a linteg ken regulasyon.
Kabayatanna, naikkan met iti bileg dagiti Local Chief Executives kadagiti saan a nadakamat a rehiyon a mangideklara ti localized suspension ti klase wenno trabaho maibasar iti assessment da.
Iti sabali a bangir, ti desisyon met iti kanselasyon ti serrek kadagiti pribado a sektor ket impadepende lattan ti Malakanyang kadagiti nakangatngato iti kompanya.
