Inaklon ni Department of Justice (DOJ) Secretary Jesus Crispin “Boying” Remulla nga agtaltalinaed latta a dakkel a problema iti uneg ti hanay ti kapulisan ti agtultuloy a matiltiliwan da nga ilegal nga aktibidad kas iti panagay-ayam ti kara krus a maar-aramid kas ‘quota filler.‘
Segun kenni Remulla, mapaspasamak ti kakastoy a panagtiliw tapno laeng masambot ti accomplishment report nga ipadamag ti maysa a pulis iti nakangatngato kenkuana. Kinuna iti sekretaryo a ti waragawag ket kas sungbat ti interpelasyon wenno panagdamag ni Akbayan Party-list Representative Percy Cendaña iti kangitingitan ti maisaysayangkat a deliberasyon ti pondo ti House Appropriations Committee para ti Department of Justice (DOJ).
Innayon na pay a ti agdama a panawen ket awan pay ti sigurado ken konkreto a datos nu kasatno a kaado dagiti tattao a matiltiliwan dagiti pulis gapo laeng iti simple a panagtaya ti kara krus wenno dadduma pay a klase ti babassit a panagsugal. Nupay kasta ket nainget na met a pinasingkedan a ti kastoy a sistema ket mapalpalubosan latta agsipud ta adda latta dagiti korap a miembro ti kapulisan a mangpatpatol ti kastuy nga aramid.
Impasigurado ita ni Remulla nga ipadanon na ti saritaan ken dakamaten iti nasao a sensitibo nga isyu kenni PNP Chief Jose Melencio Nartatez.
