LA UNION – Agpanpanawagan dagiti sumagmamano a residente iti Barangay Santiago, ili ti Bauang, La Union kadagiti maseknan nga ahensya ti gobyerno a makiballaet gapu ta iti isyu ti panaglakuan ti daga nga asideg ti baybay kangrunaan iti Sitio Kompadas.
Iti pannakiuman ti Bombo Radyo kenni Melbie Alonso, residente ti nasao a lugar, kinunana a dismayado daytoy iti panangilako dagiti sumagmamano a kaarrubana iti lote kadagiti taga syudad ti Baguio.
Sigun kenni Alonso, adu kadagiti kalugaranna iti awanan ti bukod a daga ken agsidsiddaaw daytoy a manipud pay iti sabali a lugar iti agnumar kadagiti maipagarup a nailako a lote a makunkuna a public land.
Maipagarup nga iligal pay dagiti nairugin a naibangon nga istraktura iti nadakamat a lugar gapu ta awanan dagitoy iti umno a pammalubos manipud iti lokal a gobyerno.
Imbatad pay ni Alonso, nga uray iti rabaw dagiti naaramid a seawall ket napatakderanen ti istraktura a makasinga kadagiti mangngalap a mangipaidig iti bilogda lalo no adda ti kalamidad.
Inlawlawag ni Alonso a ti panangikalinteganda ket para iti sumaruno a henerasyon gapu iti danag daytoy a mapukawan dagitoy iti daga a panangipatakderan ti bukodda a babbalay.
Kabayatanna, naammuan met ni Santiago Punong Barangay Clarito Tangalin nga adda iti maipagarup a nagilako iti daga manipud ti nasao a lugar.
Sigun ti opisyal, maipagarup a manarimaan nga as-asikasuen iti founder ti Land Beneficiaries Association ti ownership dagiti nasao a daga.
Innayon pay ni Tangalin, tarigagayna met a maammuan manipud ti DENR ti umno a klasipikasyon iti daga no daytoy ket maibilang kas public land.
Kabayatanna, naangay met iti taripnong iti baetan dagiti residente nga agrekreklamo ken iti lokal a gobyerno a kaddua ti DENR tapno pagsasaritaan ti nasao nga isyu.Buyaen para iti kanayonan a detalye:
