LA UNION – Nangibinglay iti bukod a kapadasan dagiti residente a naapektaran ti panangdalapus ti bagyo nga Ompong idiay probinysa ti La Union.
Sigun kenni Abeth Cura ti Barangay San Agustin, San Fernando City, daytoy iti umuna a gundaway a napadasanna ti immakar kaddua ti sumagmamano a kameng ti pamilya manipud ti balayda nga asideg iti baybay a nagturong iti simbaan gapu ti kinapigsa iti angin.
Saan isuna a nakaturog a naimbag gapu iti panagdanagna ti mister ken anakna a nagpaibati idiay balayda tapno agbantay.
Nakarikna met iti nakaro a panagamak gapu ti napigsa nga angin ken posible a panagngato iti danum ti baybay ditoy syudad ni Nana Brenda isu nga immakar metten daytoy kaddua ti pamilyana a nagturong iti evacuation center.
Kinuna met ni Mang Rodel Molina, mas kinaykayatna iti panawan ti kalapawna tapno makaliklik iti peggad, ken mangnamnama daytoy a masublianna a nakabangon pay ti pagnanaedanna.
Kabayatan nga adda kadagiti evacuation center ti sumagmamani nga apektado a residente ken agpapalabasda iti oras agingga a pumanaw ti bagyo Ompong ket makapaglinglingayda met kas iti panagdengeg kadagiti programa ken drama ti Bombo Radyo.
Kabayatanna, kinumpirma ni S/Supt. Ricardo Layug Jr., director ti La Union Police Provincial Office ken agpapaay met kas vice-chairman ti PDRRMO, agtaltalinaed a zero casualty ti sibubukel a probinsya gapu iti kinatulnog dagiti umili ken agipangpangag kadagiti patigmaan ti gobyerno.
