LA UNION – Binisita dagiti kameng ti Overseas Workers Welfare Administration (OWWA) dagiti OFWs a taga rehiyon uno a naggapo idiay Saudi Arabia, a kadwa a nagawid ditoy Pilipinas ni President Rodrigo Duterte iti napalabas nga state visit na iti nasao a pagilian.
Maiyannurot daytoy iti nagbalin a direktiba nga impaulog ti ahensiya a bisitaen dagiti nasao nga OFWs tapno iberipika nu dagitoy ket taga Ilocos Region kasta metten a maamwan nu anya ti kasapolan dagitoy a tulong babaen kadagiti programa ti ahensya.
Base iti nakalap nga impormasyon ti Bombo Radyo La Union, tallo nga OFWs a naggapo idiay Saudi iti taga La Union; dua (2) idiay Ilocos Sur; ken uppat (4) manipud probinsiya ti Pangasinan.
Maipalagip a dagiti nasao nga OFWs a naka-aramid iti nalaglag-an a panaglabsing iti linteg idiay Saudi ket inikkan ti amnestiya ti Saudi government.
Ngem agpar-parang iti inaramid a panagbisita ti OWWA a sumagmamano kadagiti nasao nga OFWs ket maipagarop a saan pay a nagawid ken nagpakita iti bukod da a pamilya, agsipudta saan da a nadanon dagitoy idi nagturong dagiti kameng ti OWWA iti pagtaengan dagitoy.
