(Update 3) BAUANG, La Union – Saan pay a natutukoy iti pulisya dagiti nangitaray iti aganay P1 million cash ti Summit Bank idiay Barangay Central East, ili ti Bauang, La Union.
Base iti agtultuloy nga imbestigasyon ti Bauang Police, maipagarup a naammuanda manipud ti mangimatmaton ti bangko nga awan ti nakaduty a security guard ken nakaiddep met ti CCTV camera ti pasdek no agserserra daytoy iti rabii.
Maipagarup nga iti laeng aldaw a nakaduty ti gwardya iti nadakamat a bangko.
Agparparang iti panagsukimat ti pulisya a posible a dinadael ti suspek iti alarm ti bangko isu a saan a naguni daytoy kabayatan a mapaspasamak ti panagtakawan.
Kabayatanna, ipaspasidongen dagiti police investigators ti panangammiris dagiti narekobre na banag a maipagarup nga inaramat ti ‘termite gang’ a mabalin nga agpaay kas ebidensya kontra kadakuada.
