LA UNION – Inarestar ti nagtipon a puwersa dagiti otoridad iti maysa a baro kalpasan ti dandani innem a tawen a panaglemmeng na iti linteg gaputi kaso a rape wenno panagrames.
Binigbig ti pulisiya iti suspek a ni Randy Laron, 24-anyos, maysa a lineman, residente ti ili a Rosario, La Union ken maibilang a Top 9 Most wanted iti City Level idiay Baguio City.
Naarestar daytoy idiay Barangay Parasapas, Rosario, La Union babaen iti bileg ti warrant of arrest, napetsaan ti Disyembre 8, 2015, nga impaulog ni Presiding Judge Ivan Kim Morales ti RTC Br 59 Baguio City Family Court.
Segun kenni Pol. Major Garry Anthony Casem, chief-of-police ti Rosario PS, iti kaso ket indatag ti sigud a nobya ti suspek.
Kinuna na a naglemmeng ti suspek idiay Region 3 ken Region 4 sakbay a naan-anay a natunton dagiti otoridad iti idiay Barangay Parasapas ti nasao nga ili.
Naamwan nga awan ti nairekomenda a piyansa para iti temporaryo a pannakawaya-waya iti suspek.
