Napatay dagiti pulis idiay Berlin ti 21-anyos a suspek iti panagraut kabayatan ti Christopher Street Day Pride, kalpasan a maipagarup a dinarupna dagiti autoridad bayat nga armado ti kutsilio idiay Spandau district.
Binigbig ti German authorities iti suspek a ni Abdul Ballout, maysa a German citizen nga addaan ti Lebanese heritage, ken addaan ti napigsa nga indikasion a maysa nga Ismalist terrorist attack iti napasamak.
Nagpatingga iti nasao nga operasion iti naiyusuat a nalawa a manhunt kalpasan nga inararo ti maysa a white van dagiti tattao asideg ti Tiergarten Park idi rabii ti Sabado.
Maysa a babai ti natay bayat a 29 dagiti dadduma pay a nadangran. Sumagmamano met kadagiti biktima ket nabagsol kalpasan ti panagararo ti lugan, maibasar iti imbestigasion dagiti autoridad.
Segun kenni German Interior Minister Alexander Dobrindt, siguden nga am-ammo dagiti autoridad ti suspek gapu iti nagsasaruno a criminal case ken maipagarup a koneksionna kadagiti Islamist extremist circles.
Immunan a nasentensiaan daytoy mainaig iti panagsagana ti maysa a seryoso a kinaranggas a mamagpeggad iti seguridad ti estado ken mamapati a nanggandat pay a makiuman iti Islamic State idi 2025.
Bimmisita met ni German Chancellor Friedrich Merz iti lugar a nakapasamakan ti insidente ket inkari nga idepensa ti gobierno iti wayawaya ken silulukat a komunidad ti Germany maibusor iti terorismo.
Kabayatanna, imbaga ti pulisya nga addan iti natalged a kondision dagiti nadangran iti insidente bayat nga agtultuloy iti imbestigasyon iti nasao a panangraut.###
