Inarestar dagiti pulis iti maysa a 18-anyos a suspek a maipagarup nga adda iti likudan ti serye dagiti online bomb threats a naipatulod kadagiti pampubliko ken pribado a pagadalan idiay San Ildefonso, Bulacan.
Segun kenni Police Regional Office 3 Director PBGen. Jess Mendez, nasarakan iti suspek idiay Barangay Hilera, Jaen, Nueva Ecija babaen iti naisayangkat nga intelligence ken cyber investigation.
Naisayangkat iti operasion ti nagtipon a puersa ti San Ildefonso Municipal Police Station, Bulacan Police Provincial Office, ken dagiti pulis manipud ti Talavera ken Jaen Municipal Police Stations idiay Nueva Ecija.
Narekober manipud ti suspek iti maysa a cellphone a mapapati a nausar iti panangipatulod dagiti bomb threat.
Maipasidong iti nasao a cellphone iti technical ken forensic examination ti Provincial Anti-Cybercrime Unit kas paset ti agtultuloy nga imbestigasion.###
