BR LA UNION – Nabigbigen dagiti otoridad ti dua a suspek ti pammaltog a nakatayan ti maysa a salon owner iti pwesto idiay Daproza Street, General Santos City idi Miyerkules, Enero 15, 2025, agarop alas 6:55 ti rabii.
Daytoy iti kinumpirma ni P/Capt. Cyrus Vince Arro ti Pendatun Police Station iti interview ti Bombo Radyo.
Nupay kasta, saan pay nga insapubliko dagiti otoridad ti nagan dagiti suspek tapno saan a madiskaril iti isay-sayangkat nga imbestigasyon ken hot pursuit operation para iti pannaka-kemmeg dagiti suspek.
Nabigbig iti biktima a ni Renante Tampus, 34, residente ti Uhaw, Brgy. Fatima ti nasao a siyudad.
Maipagarop a simrek ti maysa a suspek kagiddan ti kellaat a panag-bunot na ti paltog ken nagpaputok iti uneg ti salon.
Makita iti CCTV footage a namin-adu a daras a nagsubli iti suspek tapno masiguro a tinamaan na iti biktima.
Kalpasan ti insidente, dagus a naglibas iti suspek usar ti maysa a motorsiklo kadwa na ti maysa pay a suspek a nagserbi a look-out.
Kabayatanna, dagus a naiturong ti biktima iti ospital nguem natay met laeng.
Narekober iti crime scene dagiti basyo ti bala ti Cal.35 ken Cal .38.
Maibasar iti imbestigasyon, personal a susik iti makitkita a motibo ti pammaltog segun iti partner iti akinkukua ti salon.
Kinuna na pay a siguden a makaaw-awat ti adu a pangta ni Tampus manipud kadagiti sigud a kasosyo na iti negosyo.
Iti agdama, agtultuloy iti hot pursuit operation dagiti otoridad tapno makemmeg dagiti suspek ken maidatagan ti kaso a murder.
