LA UNION – Karaman itan iti lookout bulletin ti Bureau of Immigrations ni suspended Bamban, Tarlac Mayor Alice Guo ken 17 pay a dadduma.
Segun kenni Bureau of Immigrations Commissioner Norman Tansingco, naawat dan iti tallo a pinanid nga immigration lookout bulletin order (ILBO) manipud Department of Justice.
Kiniddaw ti Department of Justice iti lookout order gapu iti kadagsen ti kaso kontra kenni Guo ken dadduma pay ket posible a pumanaw wenno aglibas da ditoy pagilian.
Babaen ti immigration lookout bulletin order, dagiti immigration officers ket agbalin nga alerto ken i-double check dagiti tattao a nakalista wenno addaan ti nakapenpen a warrants.
Innayon pay ni Tansingco a naka-encode iti sistema ti ahensiya ti nasao nga alert.
