Kidkiddawen ti Commission on Elections (Comelec) kenni Presidente Ferdinand Marcos Jr. nga ideklara nga awan ti serrek iti trabaho ken klase inton Nobiembre 3, 2026, maysa nga aldaw kalpasan ti Barangay ken Sangguniang Kabataan Elections (BSKE), tapno maallukoy iti ad-ado a botante a makabotos.
Segun kenni Comelec Chairperson George Erwin Garcia, iti kiddaw ket naikonsiderar gapu ta iti Nobiembre 1 ken Nobiembre 2 ket agpada nga special non-working days para iti panagrambak ti All Saints’ Day ken All Souls’ Day.
Kenunana, no awan met iti serrek iti Nobiembre 3, maaddaan ti umdas a panawen dagiti botante a makaawid kadagiti probinsya da tapno makabotos sakbay nga agsubli kadagiti trabaho wenno pagadalan da.
Inkeddeng ti Comelec iti panangipila ti Certificates of Candidacy (COC) para iti BSKE manipud Setyembre 28 agingga Oktubre 5, 2026 ken kasapulan nga agisubmitir ti birth certificate kas paset ti requirements.
Nakatuding met ti campaign period manipud Oktubre 22 agingga Oktubre 31, 2026. Mainaig ditoy. nagballaag iti poll body a mabalin a mapaulogan ti maitutop a dusa dagiti kandidato a mangisayangkat ti premature campaigning.
Segun pay ti Comelec, nasurok 5.47 million a baro nga aplikasion iti voter registration iti naawat da iti pito a bulan a registration period para ti BSKE.###
