LA UNION – Awan iti maris a “political harassment” iti kaso a sangsangwen ni suspended San Fernando City Mayor Herminigildo ‘Dong’ Gualberto.
Daytoy iti bukod a kapanunutan ni sigud a Sangguniang Panlalawigan Member Atty. Reynaldo Mosuela base kadagiti nabasa na a dokumento maipapan iti nasao nga isyu.
Iti eksklusibo a pannakiuman ti Bombo Radyo La Union kenni Atty. Mosuela, kinuna na a napatgan met dagiti kadawatan ni Mayor Dong iti Sangguniang Panlungsod nga idaulwan ni City Vice Mayor Alf Ortega, a pakaibilangan iti kiddaw na a pagbalinen a cultural heritage iti city plaza.
Iti nagbalin a problema kunana ket iti biddut a panangusar ti mayor iti 20% Development Fund ti syudad para iti rehabilitasyon ti City Plaza, banag a saan a maiparbeng ken panaglabsing iti guidelines for development projects a nakailanad iti joint memorandum circular nga inyetnag ti DILG ken DBM.
Ngem impaganetget ni Atty. Mosuela nga awan iti imbulsa a pondo ni Mayor Dong manipud iti nasao a proyekto.
Pattien na nga ‘in good faith’ ti mayor isunga dackel ti posibilidad a malusotan na iti sangsangwen daytoy a kaso.
Maipalagip nga immuna nga inikkat iti puwesto ti Office of the Ombudsman ni Mayor Dong idi January 2020 gaputi kaso a grave misconduct ken gross neglect of duty, ngem inyapela na ti kaso iti Court of Appeals (CA) ket nangabak idi September 2020.
Segun iti CA, simple neglect of duty laeng iti nagbasolan ni Gualberto ken awan iti naaramid a gross negligence, isunga nakasubli iti puwesto na kas mayor iti syudad idi napan a tawen.
Ngem napalabas ti aganay lima a bulan, inyetnag met ti Sandigan Bayan iti desisyon na seknan iti kaso a kriminal a sangsangwen ti mayor.
Base iti naipaulog a desisyon nga impatungpal ti DILG-La Union, napatawan ti 90-days preventive suspension ni Mayor Dong gaputi panaglabsing iti anti graft and corrupt practices act partikular iti biddut a pannaka-aramat iti 20% local development fund.
