Agtaltalinaed ti pammilin ti Sandiganbayan para iti 90-day preventive suspension da Senador Jinggoy Estrada ken Rodante Marcoleta bayat a maur-uray ti pannakarisut dagiti mosionda para iti reconsideration.
Segun kenni Senate President Sherwin Gatchalian, naawaten ti Senado dagiti pammilin ti anti-graft court. Nupay kasta, temporario a maitantan ti pannakaipatungpal ti suspension bayat a saan pay a naresolba dagiti nasao a mosion.
Innayon pay ni Gatchalian, a saan pay laeng a maipatungpal ti suspension apaman a maipila ti motion for reconsideration agingga nga awan ti maudi a resolution mainaig iti daytoy.
Kinuna pay ti Senate President a saan nga umawat da Estrada ken Marcoleta iti sueldo gapu ti kaawan da iti Senado.
Malagip nga imbilin ti Fifth Division ti Sandiganbayan ti 90-day preventive suspension ni Estrada, a sumangsango iti kaso a plunder mainaig iti mapapati a panangawat kadagiti kickback manipud kadagiti mapagduaduaan a flood control projects.
Kabayatanna, imbilin met ti Third Division ti Sandiganbayan ti isu met laeng a kapaut ti pannakasuspende ni Marcoleta mainaig iti alegasion a nakaawat daytoy iti ₱75 million campaign donation idi agserserbi pay laeng kas party-list representative.
