LA UNION – Iyaw-awis ni PBGEN Joel S. Orduña, Regional Director ti PRO-1, kadagiti umili nga agbuya iti surfing competition idiay San Juan, La Union.
Ngem kagiddan ti panangiyawis na iti publiko ket iti kondisyon nga ammo ti tumunggal maysa dagiti maipatungpal nga annuruten, dagiti do’s and don’ts, tapno agbalin a naannayas iti isayangkat a torneyo.
Kiniddaw ni Gen. Orduña iti publiko ti kooperasyon dagitoy iti security forces para iti kinatalged dagiti atleta ken viewers, nangruna ket first time in history ditoy La Union ken uray iti SEA Games iti surfing competition.
Ni Gen. Orduña ti head iti nabukel a Task Group La Union para iti SEA Games bayat a dagiti deputy task group commanders ket isuda Colonel Ysmael Yu para iti on-ground security and public safety; Commodore Caesar Bernard Valencia ti Naval Forces Northern Luzon (NFNL) para iti water security and safety; ken Office of the Civil Defense (OCD) Regional Director Melchito Castro a mangtutok iti emergency preparedness and response.
Innayon pay ti opisyal a maysa a sistematiko a seguridad iti ipak-pakat ita dagiti naka-deploy nga otoridad iti naduma-duma a suli idiay ili ti San Juan wenno surfing capital of the north.
Adda naka-assign a mangkita iti trapiko, pagparkingan dagiti behikulo, ken dadduma pay.
Malaksid kadagiti pito a surfers a mangibagi iti Pilipinas, namnamaen nga 40 athletes ti agtaud met kadagiti dadduma a pagilian iti South East Asia a maki-participate iti surfing competition ti 30th SEA Games.
