Impadamag ti Philippine Institute of Volcanology and Seismology (Phivolcs) ti panagngato ti seismic energy wenno RSAM (Real-time Seismic Amplitude Measurement) iti Bulkang Taal manipud pay idi aldaw ti Sabado, Agosto 9.
Segun iti obserbasyon ti ahensya, 19 volcanic tremors ti nailista ti Taal Volcano Network kasaruno metten dagiti katamtaman agingga napipigsa a panangipugso ti asok manipud iti ngiwat ti bulkan ken idi aldaw ti Biernes, Agosto 8, nailista ti bulkan ti average a 374 tonelada ti sulfur dioxide.
Nagpakdaar ti Phivolcs a mabalin a napartak nga agtungpal ti phreatic wenno minor phreatomagmatic eruption iti Bulkang Taal.
Kabayatanna, agtaltalinaed met iti Alert Level 1 ti bulkan a pakaibatugan ti abnormal a kondisyon na ken saan a natalged a papanan iti publiko agsipud ta agpegpeggad iti phreatic eruptions, panagbettak nga addaan iti kasurot a magma, panagtudo ti dapo, ken ti panangiruar na ti makasabidong nga asok.
Inpakdaar ti ahensya ti panagserrek idiay Taal Volcano Island, partikular iti aglawlaw ti Main Crater ken Daang Kastila fissure a maibilbilang kas permanent danger zone.
Mapawilan pay amin a klase ti erolpano nga agpatayab asideg ti bulkan ken naballaagan dagiti lokal a gobierno ti aglawlaw na a saganaan dagiti mitigation plans seknan ti epekto ti volcanic gas kadagiti komunidad.
