Dupdupodupen ti publiko a bumisbista kadagiti sementeryo dagiti aglaklako ti sabong ken kandila idiay San Juan Cemetery tapno idaton kadagiti ay-ayaten da nga addan iti nagkaysa a biag.
Iti mismo nga aldaw ti Undas, ado dagiti negosyante nga aglaklako ti sabong kadagiti nadumaduma a paset ti sementeryo.
Kenuna kadagiti aglaklako, napateg nga aldaw daytoy tapno makabawi iti kita uray pay no ngato ti kompetisyon kadagiti pada da nga flower vendors.
Iti agdama a presyo ti sabong segun kenni Gabriel Cabagbag, maysa a vendor, ngimmato iti presyo ti sabong manipud kadagiti naka-arranged a 100 ken ti bassit ngem adda ti rosas na ket agbalor ti 200. Dagiti dadakkel a naka-arranged ket mapatta-patta nga aggatad ti 1,000 aginggana 1,800 pesos. Innayon na na pay a naka-depende iti presyo ti lako da kadagiti mausar a klase ti sabong.
Kabayatanna, agtultuloy ti panagdupodop dagiti bisita kadagiti nadumaduma a sementeryo kas idiay ili ti Bacnotan. Saan laeng nga dagiti sabong ken kandila ti mabili iti ruar ken uneg ti kamposanto, no di ket pati pay dagiti taraon para kadagiti mabisin.
Segun kenni Edna Laigo, maysa a vendor idiay Bacnotan Cemetery, nangrugi da a naglako idi Oktubre 30 ngem nagsardeng na idi kalman gapo iti panagarbis.
Namnamaen na met a maibos iti lako na aginggana inton rabii gapo ti in-inot a panagado dagiti sumarungkar iti sementeryo.
