BR LA UNION – Kumpiyansa ti Taiwan a kabaelan ti militar da a dagus a rumesponde nu rumaot ti China.
Iti maysa a report ti Taiwan lawmakers, imbaga ti Taiwan defense ministry a kabaelan ti ag-operate ti amin a military unit da iti sidong ti decentralized mode of command a saanen nga urayen ti direktiba manipud iti ngato.
Inaramid ti Taiwan iti waragawag kasaruno ti namin-adun a daras a pangta ti China a mabalin da laeng a baliwan a dagus ti regular drills dagitoy iti active combat mode tapno tiliwen ti Taiwan ken ti international supporters dagitoy a saan da a madlawqan.
Inwaragawag pay ti Defense ministry ti Taiwan, nga immadu ti isay-sayangkat a military activities ti China kada tawen kabilang iti regular joint combat readiness patrols.
Segun iti ministry, agsan-sanay ti China no kasano a rauten ti Taiwan ken agpat-patulod kadagiti barko a panggubat nga umas-asideg idiay Pacific ken agturong idiay Australia ken New Zealand.
Mainaig iti daytoy, kinuna ti defense ministry nga addaan ti military-da iti standard operating practice no kasano nga ipangato ti combat alert level-da no bilang nayunan ti China dagiti war drills da iti giyera.
Immuna ti daytoy, kinontra ti gobiyerno ti Taiwan iti imbaga ti China a paset da iti teritoryo ti higante a pagilian ken impaganetget da a dagiti laeng umili ti isla ti makaikeddeng iti masakbayanda.
