Agtultuloy a bambantayan ti PAGASA dagiti tallo a bagyo iti ruar ti Philippine Area of Responsibility (PAR).
Alas-tres itay parbangon, naudi a nasaripatpatan ti Tyhoon Dolphin iti kaadayo a 755 km Amianan Amianan-a-Daya ti Itbayat, Batanes. Kabuyog na iti kapigsa ti angin nga 130 km/h asideg ti tengnga ken kapegges nga agingga 160 km/h bayat a dupdupagen iti Laud Amianan-a-Laud iti kapaspas a 15 km/h. Mangipaay ti tartaraipos daytoy ti nalulem a tangatang ken mawaraswaras a panagtudo ken panagguruod idiay Batanes.
Naudi met a nasaripatpatan dagiti dua a bagyo iti kaadayo a 1980 km ken 3435 km Daya ti Extreme Northern Luzon.
Kabayatanna, agtultuloy a mangap-apektar ti Southwest Monsoon iti Luzon ken Visayas. Mangigubay daytoy ti monsoon rains ditoy probinsia ti La Union, idiay Ilocos Sur, Abra, Benguet, Zambales, Bataan, ken Occidental Mindoro; occasional rains wenno sagpaminsan a panagtudo idiay Metro Manila, nabatbati a paset ti Ilocos Region, nabatbati a paset ti Cordillera Administrative Region, Nueva Vizcaya, Tarlac, Nueva Ecija, Pampanga, Bulacan, Rizal, Cavite, Batangas, Oriental Mindoro, ken Antique; mawaras-waras a panagtudo idiay Negros Island Region, Central Visayas, nabatbati a paset ti Luzon, nabatbati a paset ti Western Visayas, Leyte, ken Southern Leyte.
Bayat nga apagapaman agingga nalulem a tangatang ken mapatto-pattok a panagarbis iti nabatbati a paset ti pagilian gapu ti localized thunderstorms.
SUNRISE: 5:40 AM
SUNSET: 6:26 PM
