BR LA UNION – Nagdidinnungpar iti tallo nga behikulo iti kawatiwatan ti national highway a sakop ti Barangay Pangpang, Bacnotan, La Union agarop alas 9:15 ti bigat idi kanikadwa nga aldaw.
Dagiti behikulo ket pakairamanan ti maysa a fortuner a minaneho ti alyas JR ken residente ti Barangay Cabanglotan, San Juan, Ilocos Sur, kadwa na a nakalugan ti alyas Jordan, 23 anyos, maysa nga estudyante ken residente ti Barangay Dardarat, San Juan, Ilocos Sur.
Karaman ti maysa pay a Utility Van, minaneho ti alyas Ernesto, 65 years old , residente ti Barangay Turod, Sudipen, La Union, addaan ti dua a pasaheros a babbai, agtawen ti 23 ken 46 ken residente ti Bacnotan ken San Fernando City.
Ken ti maikatlo a behikulo ket maysa a pampasahero a bus, minaneho ni alyas Gary, 47 years old, ken residente ti Barangay Tubod, Santo Tomas, La Union.
Maibasar ti imbestigasyon dagiti otoridad, dumaldalyasat agturong iti amianan a direksyon ti pampasahero a bus, sumarsaruno ti Utility Van bayat a ti toyota furtuner ket kasinnabat da nga agturong iti abagatan a direksyon, idi kella-at a nagdidinungpar dagitoy.
Gapu iti aksidente, nadun-dunor ti nakalugan iti fortuner agraman ti driver ken pasaheros ti utility van, bayat a saan a nadunor ti driver ti toyota ken iti pampasahero nga bus.
Agpapada a naglak-am ti pannakadadael dagiti nasao nga lugan, ken agtultuloy ti imbestigasyon dagiti pannakabagi ti linteg .
Agtultuloy iti palagip dagiti otoridad nga taginayunen iti panagannad bayat iti panagmaneho aglalo ita nga panawen ti panagtutudo.
