Nasaripatpatan dagit tallo a Chinese research vessels iti exclusive economic zone ti Pilipinas kadagiti napalabas a tallo a lawas.
Segun kenni Philippine Coast Guard (PCG) spokesperson for the West Philippine Sea Commodore Jay Tarriela, agtultuloy ti panagmonitor da kadagiti dua a Chinese research vessels kalpasan nga ibati ti maysa kadakuada ti EEZ ti pagilian ken nagderetso sadiay Guangdong province, China idi bigat ti Martes.
Kinuna ni Tarriela a maysa nga research vessel ti nakita iti kabaybayan, partikular ti Xiang Yang Hong 302 manipud Hainan idi Mayo 1.
Babaen metten ti tulong ti dark vessel detection nga impaay ti gobierno ti Canada iti PCG, naaramidan na a maamoan ti puesto ti Chinese research vessel kabayatan ti panagserrek na iti kabaybayan ti Pilipinas.
Itay alas-otso ti bigat, Mayo 20 ket maudi daitoy a nasaripatpatan ti kaadayu a 180 nautical miles ti Rizal, Palawan.
Addaan ti Xiang Yang Hong 302 ti kaatiddog a 100 metro ken kadagsen a 4,500 tonelada ken kabaelan na ti ag-survey ti uneg ti daga.
Ti maikadua a Chinese research vessel met ket nadetect sadiay Tan Sou Er Hao a pimmanaw ti Hainan, aldaw ti Mayo 8 ti kaadayo a 130 nautical miles ti Burgos, Ilocos Norte.
Mainaig iti daitoy ket nagdeployen ti PCG ti aircraft da ken nangisayangkat ti maritime domain awareness flight tapno bantayan ti garaw ti research vessel.
