BR LA UNION – Tampok iti Kaykay Festival 2026 idiay Bagulin, La Union ti kompetisyon iti panagaramid ti walis tambo.
Adda ti tallo a wagas dagiti Bagulinians iti panagaramid ti walis tambo, maaw-awagan ti señorita, solas, ken pinisiwan, nagduduma nga estilo ken teknik iti tradisyunal a soft broom making.
Ditoy a makita iti talento ken kinaanus dagiti umili ti Bagulin nga agaramid ti walis tambo, kas paset pay laeng ti selebrasyon ti Kaykay Festival 2026 ken panagpiyesta ti ili.
Inlawlawag ni Juvy Sagapan, Municipal Agriculturist ti Bagulin, a ti señorita a wagas, ket maurnong nga umuna ken linisen dagiti tambo. Kalpasan dayta ket maurnos a maipatakder dagiti tambo sakbay a galutan tapno agbalin a naurnos ken nasiksik a walis.
Iti met solas, pagtitiponen dagiti tambo nga agpapada ti kaatiddog na. Mas napigsa ti pannakagalutna tapno natalged ken agtaltalinaed ti porma.
Bayat a ti pinisiwan, pagsisinaen dagiti tambo iti bassit a bunggoy sakbay a pagtitiponen. Daytoy ket agresulta iti mas napino ken naurnos a walis.
Babaen kadagitoy a proseso, naipakita ti wagas dagiti taga-Bagulin iti panagaramid ti walis tambo.
Dagiti mangabak a mannalon iti kompetisyon ket maibasar iti sumaganad a criteria:
60 percent – para iti dait wenno kinaurnos ti panagaramid
30 percent – kinapartak ken
10 percent – creativity
Innayon pay ti Municipal Agriculturist adu pay dagiti aktibidad iti Kaykay Festival 2026.
Ita nga aldaw ti Biyernes, March 20 ket maaramid ti Rabii ti Umili ken field demo dagiti estudyante, ken inton March 21 ket maangay ti kangrunaan a paset ti selebrasion — ti Coronation Night dagiti beauties ti Bagulin.
Adda pay ti maisayangkat inton bigat, Marso 21, a Marathon Competition a para laeng kadagiti Bagulin riders.
Ti nasao a kompetisyon ket saan laeng a maipapan iti kinapaspas, ngem ketdi, mapadas pay iti endurance and determination dagiti Bagulinians a tumaray a pangato wenno uphill .
Adda premyo para kadagiti mangabak a 1st Place – ₱5,000.00 ; 2nd Place – ₱3,000.00 ; 3rd Place – ₱2,000.00 ; ken Special Prize: para kadagiti umuna a 10 finishers – ₱500.00 each.
