LA UNION – Inyanunsiyo ti lokal a gobyerno ti San Gabriel, La Union a linukatan dan iti Tangadan Falls para kadagiti turista.
Kagiddan iti pannakailukat ti nasao a pagpasyaran kadagiti turista, iti nainget latta a pannakaipatungpal ken panangsurot kadagiti naiyetnag a minimum health standards ken health protocols, tapno maliklikan iti transmission iti COVID 19.
Base iti impormasyon, malimitaran laeng iti 100 a turista iti inaldaw, dagiti mapalubosan nga agturong iti Tangadan Falls.
Paset iti nairut a proseso, kasapolan nga agpa-book wenno agparehistro nga umuna dagiti turista, dua agingga tallo nga aldaw, sakbay nga agturong iti nasao nga ili.
Iti booking ket Lunes agingga Biyernes, manipud alas 9:00 ti agsapa agingga alas 5:00 ti malem.
Kasapolan pay nga isumite iti munisipiyo ti San Gabriel dagiti kasapolan a dokumento, kangrunaan na iti health certificate nga agtaud iti naggapwan nga ili, babaen iti email.
