BR LA UNION – Nagsango da Sagip partylist Rep. Rodante Marcoleta ken Philippine Coast Guard (PCG) spokesperson Commodore Jay Tarriela iti panagdengngeg ti House tri-committee idi kalman (Pebrero 18), seknan iti waragawag ti mammanday linteg nga awan ken parbo laeng iti West Philippine Sea.
Immuna a naaddaan ti kinnontra dagti dua babaen iti sinnukat ti inruar da nga statement iti naglabas nga aldaw.
Para kenni Marcoleta, saan a rumbeng nga ipilit nga usaren ti sarita a West Philippine Sea iti panangdakamat iti kabaybayan iti laud a paset ti pagilian agraman dagiti features a tag-tagi-kuaen ti China.
Para met kenni Tarriela, masdaaw iti kongresista nu apay nga ibagbaga na a saan a mabalin nga awagan ti nasao a kabaybayan kas West Philippine Sea ken nu anya iti rekomendasyon na ditoy.
Impaganetget ni Tarriela a Kongreso mismo ti nangpasingked ti Philippine Maritime Zones Act babaen ti botos nga awan a pulos ti nangkontra ken nag-abstain.
Inlawlawag ni Tarriela a saanna a partikular nga inawagan a traydor iti mammanday linteg.
Mainaig ti daytoy, impaganetget ti maysa a maritime law expert a ti West Philippine Sea ket saan a produkto laeng ti imahinasyon dagiti Pilipino, nudiket daytoy ti opisyal nga impanagan ti gobyerno iti exclusive economic zone ti Pilipinas.
Segun kenni Atty. Jay Batongbacal ti UP Institute for Maritime Affairs, iti West Philippine Sea ti opisyal a nagan nga impaay ti gobyerno iti exclusive economic zone ken continental shelf ti Pilipinas, partikular iti 200 nautical miles manipud iti baselines ti archipelago ti pagilian.
