Agtultuloy a papigpigsaen ti Probinsia ti La Union dagiti programa ken proyekto a mangsuporta iti sports, turismo, agrikultura, edukasion, ken dadduma pay a sektor para iti agtultuloy a panagdur-as ti Probinsia.
Ibinida ni La Union 1st District Representative Francisco Paolo P. Ortega V, nga agex-excel ti Probinsia iti individual sports kas iti swimming, bullshark, orcas, weightlifting, ken surfing, a pakairamanan dagiti atleta nga agtultuloy a mangipakita iti naimbag a performance iti nagduduma a kompetision kas iti Asian Games.
Nupay kasta, inlawlawag ni Cong. Ortega a saan pay a kaskasdi ti kadakkel dagiti sports facilities iti Probinsia. Gapuna, naipangpangruna ti plano a panagpatakder ti Sports Coliseum idiay Barangay Sevilla, Siudad ti San Fernando, La Union.
Segun kenni Cong. Ortega, maawatan na ti kasasaad ken kasapulan dagiti atleta gapu ta isuna mismo ket naggapu met iti daytoy a lugar. Kinunana a dakkel a tulong kadagiti atleta ti panangipaay iti recovery food ken uray bassit laeng nga equipment.
Nupay limitado dagiti equipment, mamatmatini Cong. Ortega a no nalaing ti coach a mangisursuro, kabaelan latta dagiti atleta nga ag-excel iti napilida nga sport.
Segun pay kenkuana, agtultuloy ti panangilungalong na tapno mapondohan dagiti sports infrastructures iti La Union a makatulong iti panagsanay ken panagdur-as dagiti atleta.
Malaksid iti Sports Coliseum, manamnama met ti panagpatakder iti sports complex para iti archery. Iti kinapudno, addaanen dagiti naipatakder a multicourts idiay Bacnotan para iti paddle, volleyball, basketball, ken pickleball, a sinuportaran met ni Senador Pia Cayetano.
Malaksid iti sports, binigbig pay ni Cong. Ortega nga agtultuloy a maipaay iti atension iti agrikultura, turismo, salun-at, edukasion, empleo ken dagiti agtutubo, a karaman iti development goals ti Probinsia.
Inlawlawagna met a kas ti Pilipinas a maysa a developing nation, agtultuloy latta a karit dagiti basic needs ken panginaldaw-aldaw a karit dagiti Pilipino. Nupay kasta, maibagana a nalag-an latta ti panagbiag ditoy Probinsia.
Nagyaman met ni Cong. Ortega iti papel ti turismo iti panangipaay iti oportunidad ken pagbiagan kadagiti taga-La Union, ngem impaganetgetna a masapul latta a maprotektaran iti aglawlaw.
Mensahe ni Cong. Ortega iti publiko kasapulan ti panagtitinulong ti amin tapno agtultuloy ti progreso ken panagdur-as ti La Union. (Report by Bombo Jordan)
