LA UNION – Makaung-unget dagiti sumagmamano nga ina a nagturong iti istasion ti Bombo Radyo La Union kalpasan a nagawid a kalbo ti anakda nga agad-adal iti La Union National High School iti San Fernando City, La Union.
Segun iti saanen a nainaganan nga ina, naklaat laengen daytoy iti napasamak iti buok ti anakna a grade 10, gapu ta no ar-arigen ket naingpis pay ti pukis dagitoy isu a saan koman a kasapulan a tikapan ni Mr. Ramon Balcita.
Innayonna pay a nasken koma a napakdaaran dagiti annakda sakbay ti eksaminasion iti Citizenship Advancement Training (CAT) a naisayangkat idi kalman.
Innayonna pay nga imbes a gumatang iti sidaen ti anakna ket ginastosda laengen ti kuarta tapno ipaurnos ti pukis daytoy.
Kabayatanna, maysa met nga ina ti nangawag a “bullying” ti inaramid ti mannursuro.
Impaganetget met ni Balcita a nabayagen a napakdaaran dagiti estudiante a masapul nga “army cut” ti pukis dagitoy gapu ta required iti subject ken nailanad iti handbook ti pagadalan.
