LA UNION – Agtultuloy ti imbestigasyon iti pulisya maipapan iti napasamak a pammalatog a nakatayan iti adminsitrative officer ti Technical Education and Skills Development Authority (TESDA) idiay kawatiwatan ti national highway idiay Barangay Paringao, ili ti Bauang, La Union agarup alas-6:40 idi rabii.
Nabigbig ti biktima a ni Mila San Juan, 54, ken residente ti nasao a lugar.
Sigun kenni C/Ins. Joel Lagto, hepe ti Bauang Police Station, kabayatan a nakatakder ti biktima iti igid ti kalsada ket pinaltugan daytoy iti dua a suspek nga agkalubbon iti dua a motorsiklo ken napartak a naglibas kalpasan ti napasamak a krimen.
Dagus met a naiturong idiay Ilocos Training and Regional Medical Center ti biktima ngem natay met laeng daytoy kabayatan a matamtaming.
Kinuna pay ti opisyal, nga addan ti kitkitaenda a motibo maipapan ti napsamak a krimen ngem saanda pay a mabalin nga isasapubliko daytoy agingga a saan pay a napalpas ti imbestigasyon.
Agpanpanawagan met ni Lagto kadagiti kakailyan nga addaan ti napateg nga impormasyon maipapan ti napasamak a krimen a makikoordinar laeng dagitoy idiay opisinada tapno dagus a marisot ti kaso.
Kabayatanna, nagkedked pay a mangipaay ti reaksyon ti pamilya iti biktima maipapan ti napasamak a pammapatay.
Mangnamanma met dagiti makaam-ammo ken kakabagyan ti biktima a maipaayan ti hustisya iti pannakatay daytoy.
