Dinayaw ni House Committee on Higher and Technical Education Chair Rep. Jude Acidre iti panangilunsad ti “TESDA Skills Passport,” a kunana ket maysa a naintiempuan a reporma para iti technical and vocational education and training (TVET) iti pagilian.
Segun kenni Acidre, a co-chair ti EDCOM II, iti nadakamat nga online platform ket direkta a mangsungbat kadagiti pagkapuyan a nagparang iti report ti komision tapno masolbar iti “skills mismatch” ken “underemployment” dagiti Pilipino.
Iti sidong ti Skills Passport ti TESDA, mabalinen nga agurnong dagiti mangmangged ti training records, National Certificates (NC), ken competencies iti maysa a natalged a digital platform a mangipaay ti access kadagiti scholarship ken job matching.
Sumagmamano a kangrunaan a inpunto ni Acidre:
Bridge to Work: Maibasar iti EDCOM II report, ngimmato ti employment rate dagiti TVET graduates ti 58% manipud iti sigud a 37% kalpasan ti training, isu a napateg a pagbalinen a napartak ken “portable” dagiti credentials.
Saan a “Fallback”: Impaganetget ni Acidre, rumbeng a mabigbig ti TVET kas mararaem a dalan nga agturong iti disente a trabaho ken saan laeng nga alternatibo no saan a makakolehio.
Itantandudo pay ti mammanday-linteg iti Enterprise-Based Education and Training (EBET) Framework Act tapno mapapigsa ti koordinasion dagiti pagadalan ken kompania para iti apprenticeship ken upskilling dagiti mangmangged.###
