BR LA UNION – Napateg ti testimonya ni Lemuel Ortonio, agdama nga Assistant Secretary ken Assistant Chief of Staff ti Office of the Vice President (OVP) gaputa mapapati a mangpapigsa daytoy kadagiti alegasyon ti iregularidad iti pannakaaramat ken liquidation ti confidential funds.
Daytoy ti inwaragawag ni House lead prosecutor ken Batangas Rep. Gerville “Jinky Bitrics” Luistro.
Kinuna ni Luistro a kinumpirma ni Ortonio ti sumagmamano nga isyu iti panag-request, panag-release, panagusar ken panag-liquidate ti pondo kas maibasar iti Joint Circular No. 2015-01.
Karaman ditoy ti P250 million a kiniddaw ti Office of the Vice President (OVP) idi Agosto 22, 2022 nga awan iti computation, projection ken Physical and Financial Plan (PFP).
Naaprubaran laeng ti Physical and Financial Plan, dandani makabulan kalpasan ti request.
Segun pay kenni Luistro, nagtunos ti testimonya da Ortonio ken sigud nga special disbursing officer Gina Acosta a dagiti inaramidda iti pondo ket maibasar iti bilin ti head of agency.
