Opisialen nga inawat ti Association of Southeast Asian Nations (ASEAN) iti pagilian a Timor-Leste (East-Timor) kas maika-11 nga miembro kalpasan ti 14 a tawen a panaguray.
Naaramid iti pormal a panaganunsio iti naangay nga ASEAN Summit idiay Kuala Kumpur ita nga aldaw, ken naingato iti bandera ti Timor-Leste iti hanay dagiti dadduma pay a pagilian.
Segun kenni Prime Minister Xanana Gusmão, naisangsangayan a kanito daytoy para iti pagilian a Timor-Leste.
‘For the people of Timor-Leste, this is not only a dream realized, but a powerful affirmation of our journey’
Nakaragsakan met daytoy ni Timor-Leste President Jose Ramos-Horta ken kenunana a nabayagen a tarigagay ti pagilian nga agbalin a paset ti ASEAN tapno mapapigsa iti relasion ti rehion kadagiti kabangibang a pagilian ti Southeast Asia.
Nupay bassit iti ekonomiya da nga agarop $2 billion, mangnamnama iti gobierno a mangited-dalan ti panagbalin da a miembro kadagiti ad-ado pay nga oportunidad iti kalakalan ken panagpuonan.
Ti Timor-Leste ket sigud nga indauluan ti Portugal ken nasakop ti Indonesia sakbay a nagun-od iti wayawaya idi 2002.###
