Mangrugin inton Lunes, Marso 23, iti panangipaay ti diskuento ti toll operators kadagiti pampasahero a lugan, bus, ken freight services.
Segun ti Department of Transportation (DOTr), agpaut daytoy ti aginggana dua a bulan tapno mapalag-an iti dadagsen dagiti operators iti agtultuloy a panagngato ti presyo dagiti produkto a petrolyo.
Saklawen daytoy dagiti Class 1 public utility vehicles (PUV’s) wenno jeep, Class 2 public utility bus (PUBs), ken Class 3 a lugan a mainaig kadagiti freight ken logistics services.
Immunan nga inbilin ni Presidente Ferdinand Marcos Jr. kadagiti transport official nga agsapul ti wagas tapno matulungan iti sektor ti transportasion gapu iti krisis idiay Middle East.
Kalpasan a nagsurat ni Transportation Secretary Giovanni Lopez kenni Toll Regulatory Board Executive Director Jay Tugade ket immanamong dagiti concessionaries iti boluntario nga implementasion ti diskuento.
Maibasar iti rates, makatipid ti agingga ₱18 iti end-to-end a biyahe iti Class 1 a lugan, bayat nga iti Class 2 ket addaan ti agingga ₱47, ken ₱72 iti Class 3.###
