LA UNION – Natiliwen dagiti otoridad iti maibilbilang a Top 1 most wanted person idiay Bauang, La Union.
Nabigbig daytoy iti nagan a Johndy Onoza, 45, addaan asawa, tubo ti Barangay Acao, Bauang ngem naarestar daytoy iti lugar a naglemmengan na, idiay Barangay Tawin tawin, Alaminos City, Pangasinan.
Naarestar iti suspek babaen iti bileg ti warrant of arrest a napetsaan ti April 13, 2018 nga impaulog ni Executive Judge Ferdinand Fe ti Bauang RTC Br 67, gaputi kaso a robbery ken homicide, nga awan iti nairekomenda a piyansa.
Ni Onoza iti matudtudo a responsable iti napasamak a panagtakawan iti Philip Morris Fortune Tobacco Corp. idiay Barangay Acao idi Pebrero 12, 2018 ken pannakatay ti on-duty guard a ni Ricardo Fernandez gaputi adu a tama ti bagsol, tubo ti Barangay Dulag, Binmaley, Pangasinan.
Iti suspek ket adda itan iti kustodiya dagiti otoridad tapno sungbatan iti inaramid na a krimen.
