LA UNION – Arestado iti maysa a 37-anyos a mister kalpasan a nakumpiskaran iti iligal a droga, bala ken paltog iti uneg mismo ti pagtaengan na idiay Barangay Ili Sur, San Juan, La Union.
Iti suspek ket nabigbig iti nagan a Raymund Monis, maibilang a Top 2 Priority Target iti Municipal Level.
Maiyannurot iti bileg ti search warrant a napetsaan ti Nobyembre 4, nga impaulog ni Judge Alan M. Ordonio ti MCTC San Juan, sinukimat dagiti otoridad iti pagtaengan ti suspek, a nagresulta iti pannaka-kumpiskar da iti maysa a cal. 9mm a paltog nga addaan ti uppat a bala, maysa a cal.22 a loaded ti uppat a bala, ken maysa a transparent plastic sachet a naglaun ti maatap a marijuana, agdagsen ti dua a gramo ken mapatta-patta nga agbalor ti P240.00
Naibalud iti suspek gaputi kaso a panaglabsing iti RA 10591 wenno Comprehensive Firearms and Ammunition Regulation Act ken Republic Act 9165—The Comprehensive Dangerous Drugs Act of 2002.
