LA UNION – Natiliwen dagiti otoridad iti maibilbilang a Top 8 Most Wanted Person ditoy La Union kalpasan ti 12 tawen a panaglemmeng iti linteg.
Iti suspek ket nabigbig iti nagan nga Armando Garcia, 50 anyos, maysa a mannalon ken residente ti Brgy Palugsi-Limmansangan, Bauang, La Union.
Naarestar ti suspek kalpasan iti insayangkat nga operasyon dagiti otoridad, maiyannurot iti bileg ti warrant of arrest napetsaan ti June 14, 2007, January 7, 2008 ken June 14, 2007 nga impaulog ni Judge Rose Mary R. Molina-Alim ti RTC Br. 33
Adda pakainaigan na daytoy iti tallo a krimen a maipagarop nga inaramid ti suspek a pakaibilangan ti Rape, Statutory Rape ken Acts of Lasciviousness.
Iti eksklusibo nga interview ti Bombo Radyo La Union kenni PMAJ JEOFREY SANCHEZ, agdama a chief-of-police iti Bauang Police Station, kinuna na a menor de edad pay laeng idi dagiti biktima ken maipagarop a cabagyan ti suspek.
Kinuna ni Sanchez a nabayagen a sapsa-polen dagiti otoridad ti suspek a mapapati a naglemmeng iti adayu a lugar, ket ita laeng a panawen ti pandemya a nagawid iti lugar da.
Iti suspek ket adda ita iti custodiya ti Bauang Police Station.
