LA UNION – Iti maika-11 a nagsasaruno a lawas, naipatungpal ita nga aldaw ti Martes, Marso 15, 2022 iti maibilang a record high nga oil price hike kadagiti produkto a petrolyo ditoy Pilipinas.
Kinumpirma dagiti oil companies iti baro nga oil price increases, nga epektibo itay tengngat parbangon.
Iti Unioil ket nangipatungpal ti P13.15 kada litro iti Euro5 diesel bayat a P7.10 iti kada litro ti gasolina epektibo alas-6:00 ita nga agsapa.
Uray iti Flying V ket nangiyemplementar iti kapada a price hike iti krudo ken gasolina, idinto nga iti kerosina ket ngimmatu ti P10.50 kada litro.
Iti PTT Philippines, Petron, Caltex, Seaoil at Shell ket addaan met laeng iti kapad-pada a panagngato iti presyo ti petrolyo, gapwanan iti panaggaraw ti presyuan iti international oil market.
Iti Cleanfuel ti kasapaan a nangipatungpal iti record high nga oil price hike, nangrugi pay itay alas-12:01 ti parbangon.
Kabayatanna, nagballaag iti Department of Energy (DOE), a posible a danonen iti lokal a presyuan ti gasolina iti kantidad nga P86.72 kada litro bayat nga iti krudo ket posible met nga umabot iti P81.10 nu agtultuloy iti global oil crisis.
Segun kenni Energy Undersecretary Gerardo Erguiza Jr., saan a maliklikan daytoy nu agtultuloy met iti panagngato iti presyo ti krudo iti world market.
Daytoy iti maaw-awagan a domino effect iti timpuar a giyera iti baetan ti Russia ken Ukraine. Iti ngamin Russia iti maysa kadagiti top producer ken oil exporter ti krudo wenno petrolyo iti intero a lubong, sumaruno iti Estados Unidos ken Saudi Arabia. Iti Russia ket agsup-supply iti aganay 10 percent iti pakabuklan a supply ti petrolyo iti sangalubongan, ngem nagsardeng nga ag-export gaputi sanction a naipataw kadakuada kalpasan a rauten ken gubaten na iti Ukraine.
Kabayatanna, ditoy lokalidad partikular ditoy siyudad ti San Fernando, pinilaan dagiti motorista nangrugi pay idi malem kalman iti naduma-duma a gasolinaan tapno agpakarga ti adu bayat a dagiti dadduma ket nagpa-full tank ken adda pay iti naggatang para iti reserba dagitoy, sakbay a naipatungpal iti record high nga oil price hike dagiti produkto a petrolyo ita nga aldaw ti Martes.
Base iti report ken panag-monitor ti Bombo Radyo Newsteam iti naduma-duma a gas station ditoy siyudad, kaadwan a gasolinaan nga agop-operate ti 24 oras ket nakarikep ket posible a naibusan dagitoy iti produkto gaputa pinilaan dagiti motorista idi kalman.
