Maibilang a resigned wenno naglusulosen iti serbisyo iti Philippine National Police ni sigud a PNP chief Nicolas Torre III, kalpasan nga awaten na iti posisyon kas baro a General Manager ti Metropolitan Manila Development Authority idi Disiembre 26, 2025.
Segun kenni National Police Commission Vice Chairman Rafael Vicente Calinisan, iti panagtugaw ni Torre iti MMDA ket mangipasimudaag ti “ipso facto resigned” wenno awtomatiko a panagikkat iti pwesto.
Iti panaglusulos na ket mangited dalan tapnu agbalinen nga hepe ti PNP ni Lt. Gen. Jose Melencio Nartatez Jr. ken maala na iti kangatwan a ranggo kas heneral a sigud nga iggem ni Torre.
Ni Torre iti umuna nga alumnus ti Philippine National Police Academy a nangidaulo ti PNP, a paset ti “Tagapagpatupad” Class of 1993. Pagaammo met isuna gapu iti nasurok tallo a dekada a serbisyo iti kapulisan.
Nagbalin met isuna a lider ti Criminal Investigation and Detection Group (CIDG) a maysa kas napapateg a papel na.
Maipalagip a naaddaan ti saan a pinagkinnaawatan ni Torre ken ti Napolcom idi i-reshuffle na dagiti senior police officials.
Posible ng agtultuloy isuna iti puwesto kas PNP Chief nu kinedkedan na iti pwesto iti MMDA, aginggana dumanon isuna iti mandatory retirement age a 56 inton Marso 2027.
